Skip to main content
x

የኢሕአዴግ ሥራ አስፈጻሚ ኮሚቴ ትልልቅ የመንግሥት የልማት ድርጅቶችን ሙሉ በሙሉ ወይም በከፊል ወደ ግል ይዞታ በአክሲዮን ሽያጭ ለማስተላለፍ በወሰነው መሠረት፣ የኢትዮ ቴሌኮም አጠቃላይ የዋጋ ተመን እንዲሠሩ በዓለም አቀፍ ደረጃ አራቱ ትልልቅ አማካሪዎች በመባል የሚታወቁትን ድሎይት፣ ኬፒኤምጂ፣ ኧርነስት ኤንድ ያንግና ፒደብልዩሲ ከተባሉትን ድርጅቶ ውስጥ አንዱን ለመቅጠር ማሰቡ ታወቀ፡፡

 

የኢትዮ ቴሌኮም ዋና ሥራ አስፈጻሚ አንዷለም አድማሴ (ዶ/ር) ከአይሲቲ ኤግዚቢሽን ጎን ለጎን በሚሊኒየም አዳራሽ ሲካሄድ በነበረው አይሲቲ ለግብርና ልማት ውይይት በኋላ ለሪፖርተር እንደገለጹት፣ የዋጋ ትመናው በቅርቡ እንደሚጠናቀቅና መንግሥትም ከሁለት ዓመታት ባነሰ ጊዜ ውስጥ ድርጅቱን ወደ ግል ማስተላለፍ ያስችለዋል፡፡

 

ጠቅላይ ሚኒስትር ዓብይ አህመድ (ዶ/ር) በፓርላማ የመጀመርያ ሪፖርታቸውን ባቀረቡበት ወቅት ለፓርላማ አባላት ለሽያጭ ይቀርባሉ ተብለው የተጠቀሱት የልማት ድርጅቶች በፍጥነት ወደ ግል እንደማይተላለፉ፣ በጥንቃቄ ተጠንቶ ከሁለት ዓመት በኋላ ሊፈጸም እንደሚችል መናገራቸው ይታወሳል፡፡

 

አንዷዓለም (ዶ/ር) አክለውም፣ ኢትዮ ቴሌኮም በራሱ አቅም የንብረት ግመታ እየሠራ እንዳለ፣ ትልልቅ ድርጅቶችን በቀጥታ ማሳተፍ የተፈለገበትም ምክንያት በፍጥነት ሥራውን ማከናወን እንዲቻል በማለት እንደሆነ ገልጸዋል፡፡

 

የኢሕአዴግ ሥራ አስፈጻሚ ኮሚቴ ግንቦት 28 ቀን 2010 ዓ.ም. ነበር ኢኮኖሚውን ካጋጠመው ቀውስ ለመታደግና የውጭ ምንዛሪ ችግርን ለመቅረፍ በማለት ድርጅቶቹን በከፊልና ሙሉ በሙሉ ወደ ግል ለማዛወር መወሰኑ ይታወሳል፡፡